“Bhante nāgasena, ‘agadassa dve aṅgāni gahetabbānī’ti yaṁ vadesi, katamāni tāni dve aṅgāni gahetabbānī”ti. “Yathā, mahārāja, agade kimī na saṇṭhahanti; evameva kho, mahārāja, yoginā yogāvacarena mānase kilesā na saṇṭhapetabbā. Idaṁ, mahārāja, agadassa paṭhamaṁ aṅgaṁ gahetabbaṁ.

Puna caparaṁ, mahārāja, agado daṭṭhaphuṭṭhadiṭṭhaasitapītakhāyitasāyitaṁ sabbaṁ visaṁ paṭihanati; evameva kho, mahārāja, yoginā yogāvacarena rāgadosamohamānadiṭṭhivisaṁ sabbaṁ paṭihanitabbaṁ. Idaṁ, mahārāja, agadassa dutiyaṁ aṅgaṁ gahetabbaṁ. Bhāsitampetaṁ, mahārāja, bhagavatā devātidevena—

‘Saṅkhārānaṁ sabhāvatthaṁ, daṭṭhukāmena yoginā; Agadeneva hotabbaṁ, kilesavisanāsane’”ti.

Agadaṅgapañho pañcamo.