“Gūthakūpato uggantvā, ko nu dīno patiṭṭhasi; Nissaṁsayaṁ pāpakammanto, kiṁ nu saddahase tuvan”ti.

“Ahaṁ bhadante petomhi, duggato yamalokiko; Pāpakammaṁ karitvāna, petalokaṁ ito gato”.

“Kiṁ nu kāyena vācāya, manasā dukkaṭaṁ kataṁ; Kissa kammavipākena, idaṁ dukkhaṁ nigacchasī”ti.

“Ahu āvāsiko mayhaṁ, issukī kulamaccharī; Ajjhāsito mayhaṁ ghare, kadariyo paribhāsako.

Tassāhaṁ vacanaṁ sutvā, bhikkhavo paribhāsisaṁ; Tassa kammavipākena, petalokaṁ ito gato”ti.

“Amitto mittavaṇṇena, yo te āsi kulūpako; Kāyassa bhedā duppañño, kiṁ nu pecca gatiṁ gato”ti.

“Tassevāhaṁ pāpakammassa, sīse tiṭṭhāmi matthake; So ca paravisayaṁ patto, mameva paricārako.

Yaṁ bhadante hadantaññe, etaṁ me hoti bhojanaṁ; Ahañca kho yaṁ hadāmi, etaṁ so upajīvatī”ti.

Gūthakhādakapetavatthu aṭṭhamaṁ.