“Padumuttarasambuddhaṁ, mettacittaṁ mahāmuniṁ; Upeti janatā sabbā, sabbalokagganāyakaṁ.

Sattukañca baddhakañca, āmisaṁ pānabhojanaṁ; Dadanti satthuno sabbe, puññakkhette anuttare.

Ahampi dānaṁ dassāmi, devadevassa tādino; Buddhaseṭṭhaṁ nimantetvā, saṅghampi ca anuttaraṁ.

Uyyojitā mayā cete, nimantesuṁ tathāgataṁ; Kevalaṁ bhikkhusaṅghañca, puññakkhettaṁ anuttaraṁ.

Satasahassapallaṅkaṁ, sovaṇṇaṁ gonakatthataṁ; Tūlikāpaṭalikāya, khomakappāsikehi ca; Mahārahaṁ paññāpayiṁ, āsanaṁ buddhayuttakaṁ.

Padumuttaro lokavidū, devadevo narāsabho; Bhikkhusaṅghaparibyūḷho, mama dvāramupāgami.

Paccuggantvāna sambuddhaṁ, lokanāthaṁ yasassinaṁ; Pasannacitto sumano, abhināmayiṁ saṅgharaṁ.

Bhikkhūnaṁ satasahassaṁ, buddhañca lokanāyakaṁ; Pasannacitto sumano, paramannena tappayiṁ.

Padumuttaro lokavidū, āhutīnaṁ paṭiggaho; Bhikkhusaṅghe nisīditvā, imā gāthā abhāsatha.

‘Yenidaṁ āsanaṁ dinnaṁ, sovaṇṇaṁ gonakatthataṁ; Tamahaṁ kittayissāmi, suṇātha mama bhāsato.

Catusattatikkhattuṁ so, devarajjaṁ karissati; Anubhossati sampattiṁ, accharāhi purakkhato.

Padesarajjaṁ sahassaṁ, vasudhaṁ āvasissati; Ekapaññāsakkhattuñca, cakkavattī bhavissati.

Sabbāsu bhavayonīsu, uccākulī bhavissati; So ca pacchā pabbajitvā, sukkamūlena codito; Bhaddiyo nāma nāmena, hessati satthu sāvako’.

Vivekamanuyuttomhi, pantasenanivāsahaṁ; Phalañcādhigataṁ sabbaṁ, cattaklesomhi ajjahaṁ.

Mama sabbaṁ abhiññāya, sabbaññū lokanāyako; Bhikkhusaṅghe nisīditvā, etadagge ṭhapesi maṁ.

Paṭisambhidā catasso, …pe… kataṁ buddhassa sāsanaṁ”.

Itthaṁ sudaṁ āyasmā bhaddiyo kāḷigodhāya putto thero imā gāthāyo abhāsitthāti.

Bhaddiyassa kāḷigodhāya puttattherassāpadānaṁ tatiyaṁ.