“Kiṁ nu ummattarūpova, Migo bhantova dhāvasi; Nissaṁsayaṁ pāpakammanto, Kiṁ nu saddāyase tuvan”ti.

“Ahaṁ bhadante petomhi, duggato yamalokiko; Pāpakammaṁ karitvāna, petalokaṁ ito gato.

Saṭṭhi kūṭasahassāni, paripuṇṇāni sabbaso; Sīse mayhaṁ nipatanti, te bhindanti ca matthakan”ti.

“Kiṁ nu kāyena vācāya, manasā dukkaṭaṁ kataṁ; Kissa kammavipākena, idaṁ dukkhaṁ nigacchasi.

Saṭṭhi kūṭasahassāni, paripuṇṇāni sabbaso; Sīse tuyhaṁ nipatanti, te bhindanti ca matthakan”ti.

“Athaddasāsiṁ sambuddhaṁ, sunettaṁ bhāvitindriyaṁ; Nisinnaṁ rukkhamūlasmiṁ, jhāyantaṁ akutobhayaṁ.

Sālittakappahārena, bhindissaṁ tassa matthakaṁ; Tassa kammavipākena, idaṁ dukkhaṁ nigacchisaṁ.

Saṭṭhi kūṭasahassāni, Paripuṇṇāni sabbaso; Sīse mayhaṁ nipatanti, Te bhindanti ca matthakan”ti.

“Dhammena te kāpurisa, saṭṭhikūṭasahassāni; Paripuṇṇāni sabbaso, sīse tuyhaṁ nipatanti; Te bhindanti ca matthakan”ti.

Saṭṭhikūṭapetavatthu soḷasamaṁ.

Mahāvaggo catuttho.

Tassuddānaṁ

Ambasakkaro serīsako, piṅgalo revati ucchu; Dve kumārā duve gūthā, gaṇapāṭaliambavanaṁ.

Akkharukkhabhogasaṁharā, seṭṭhiputtasaṭṭhikūṭā; Iti soḷasavatthūni, vaggo tena pavuccati.

Atha vagguddānaṁ

Urago uparivaggo, cūḷamahāti catudhā; Vatthūni ekapaññāsaṁ, catudhā bhāṇavārato.

Petavatthupāḷi niṭṭhitā.