“Vessabhussa bhagavato, lokajeṭṭhassa tādino; Sabbe janā samāgamma, mahāpūjaṁ karonti te.

Sudhāya piṇḍaṁ katvāna, āveḷaṁ sumanāyahaṁ; Sīhāsanassa purato, abhiropesahaṁ tadā.

Sabbe janā samāgamma, pekkhanti pupphamuttamaṁ; Kenidaṁ pūjitaṁ pupphaṁ, buddhaseṭṭhassa tādino.

Tena cittappasādena, nimmānaṁ upapajjahaṁ; Anubhomi sakaṁ kammaṁ, pubbe sukatamattano.

Yaṁ yaṁ yonupapajjāmi, devattaṁ atha mānusaṁ; Sabbesānaṁ piyo homi, pupphapūjāyidaṁ phalaṁ.

Nābhijānāmi kāyena, vācāya uda cetasā; Saṁyatānaṁ tapassīnaṁ, kataṁ akkositaṁ mayā.

Tena sucaritenāhaṁ, cittassa paṇidhīhi ca; Sabbesaṁ pūjito homi, anakkosassidaṁ phalaṁ.

Ito ekādase kappe, sahassārosi khattiyo; Sattaratanasampanno, cakkavattī mahabbalo.

Paṭisambhidā catasso, …pe… kataṁ buddhassa sāsanaṁ”.

Itthaṁ sudaṁ āyasmā sumanāveḷiyo thero imā gāthāyo abhāsitthāti.

Sumanāveḷiyattherassāpadānaṁ aṭṭhamaṁ.