“Padumo nāma nāmena, dvipadindo narāsabho; Pavanā abhinikkhamma, dhammaṁ deseti cakkhumā.

Yakkhānaṁ samayo āsi, avidūre mahesino; Yena kiccena sampattā, ajjhāpekkhiṁsu tāvade.

Buddhassa giramaññāya, amatassa ca desanaṁ; Pasannacitto sumano, apphoṭetvā upaṭṭhahiṁ.

Suciṇṇassa phalaṁ passa, upaṭṭhānassa satthuno; Tiṁsakappasahassesu, duggatiṁ nupapajjahaṁ.

Ūnatiṁse kappasate, samalaṅkatanāmako; Sattaratanasampanno, cakkavattī mahabbalo.

Paṭisambhidā catasso, vimokkhāpi ca aṭṭhime; Chaḷabhiññā sacchikatā, kataṁ buddhassa sāsanaṁ”.

Itthaṁ sudaṁ āyasmā supāricariyo thero imā gāthāyo abhāsitthāti.

Supāricariyattherassāpadānaṁ paṭhamaṁ.