“Bhante nāgasena, ‘sūriyassa satta aṅgāni gahetabbānī’ti yaṁ vadesi, katamāni tāni satta aṅgāni gahetabbānī”ti? “Yathā, mahārāja, sūriyo sabbaṁ udakaṁ parisoseti; evameva kho, mahārāja, yoginā yogāvacarena sabbakilesā anavasesaṁ parisosetabbā. Idaṁ, mahārāja, sūriyassa paṭhamaṁ aṅgaṁ gahetabbaṁ.

Puna caparaṁ, mahārāja, sūriyo tamandhakāraṁ vidhamati; evameva kho, mahārāja, yoginā yogāvacarena sabbaṁ rāgatamaṁ dosatamaṁ mohatamaṁ mānatamaṁ diṭṭhitamaṁ kilesatamaṁ sabbaṁ duccaritatamaṁ vidhamayitabbaṁ. Idaṁ, mahārāja, sūriyassa dutiyaṁ aṅgaṁ gahetabbaṁ.

Puna caparaṁ, mahārāja, sūriyo abhikkhaṇaṁ carati; evameva kho, mahārāja, yoginā yogāvacarena abhikkhaṇaṁ yoniso manasikāro kātabbo. Idaṁ, mahārāja, sūriyassa tatiyaṁ aṅgaṁ gahetabbaṁ.

Puna caparaṁ, mahārāja, sūriyo raṁsimālī; evameva kho, mahārāja, yoginā yogāvacarena ārammaṇamālinā bhavitabbaṁ. Idaṁ, mahārāja, sūriyassa catutthaṁ aṅgaṁ gahetabbaṁ.

Puna caparaṁ, mahārāja, sūriyo mahājanakāyaṁ santāpento carati; evameva kho, mahārāja, yoginā yogāvacarena ācārasīlaguṇavattappaṭipattiyā jhānavimokkhasamādhisamāpattiindriyabalabojjhaṅgasatipaṭṭhānasammappadhānaiddhipādehi sadevako loko santāpayitabbo. Idaṁ, mahārāja, sūriyassa pañcamaṁ aṅgaṁ gahetabbaṁ.

Puna caparaṁ, mahārāja, sūriyo rāhubhayā bhīto carati; evameva kho, mahārāja, yoginā yogāvacarena duccaritaduggativisamakantāravipākavinipātakilesajālajaṭite diṭṭhisaṅghāṭapaṭimukke kupathapakkhande kummaggapaṭipanne satte disvā mahatā saṁvegabhayena mānasaṁ saṁvejetabbaṁ. Idaṁ, mahārāja, sūriyassa chaṭṭhaṁ aṅgaṁ gahetabbaṁ.

Puna caparaṁ, mahārāja, sūriyo kalyāṇapāpake dasseti; evameva kho, mahārāja, yoginā yogāvacarena indriyabalabojjhaṅgasatipaṭṭhānasammappadhānaiddhipādalokiyalokuttaradhammā dassetabbā. Idaṁ, mahārāja, sūriyassa sattamaṁ aṅgaṁ gahetabbaṁ. Bhāsitampetaṁ, mahārāja, therena vaṅgīsena—

‘Yathāpi sūriyo udayanto, Rūpaṁ dasseti pāṇinaṁ; Suciñca asuciñcāpi, Kalyāṇañcāpi pāpakaṁ.

Tathā bhikkhu dhammadharo, avijjāpihitaṁ janaṁ; Pathaṁ dasseti vividhaṁ, ādiccovudayaṁ yathā’”ti.

Sūriyaṅgapañho aṭṭhamo.