“Sumedho nāma sambuddho, bāttiṁsavaralakkhaṇo; Vivekakāmo sambuddho, himavantamupāgamiṁ.

Ajjhogayha himavantaṁ, aggo kāruṇiko muni; Pallaṅkamābhujitvāna, nisīdi purisuttamo.

Vijjādharo tadā āsiṁ, antalikkhacaro ahaṁ; Tisūlaṁ sukataṁ gayha, gacchāmi ambare tadā.

Pabbatagge yathā aggi, puṇṇamāyeva candimā; Vane obhāsate buddho, sālarājāva phullito.

Vanaggā nikkhamitvāna, buddharaṁsībhidhāvare; Naḷaggivaṇṇasaṅkāsā, disvā cittaṁ pasādayiṁ.

Vicinaṁ addasaṁ pupphaṁ, kaṇikāraṁ devagandhikaṁ; Tīṇi pupphāni ādāya, buddhaseṭṭhamapūjayiṁ.

Buddhassa ānubhāvena, tīṇi pupphāni me tadā; Uddhaṁvaṇṭā adhopattā, chāyaṁ kubbanti satthuno.

Tena kammena sukatena, cetanāpaṇidhīhi ca; Jahitvā mānusaṁ dehaṁ, tāvatiṁsamagacchahaṁ.

Tattha me sukataṁ byamhaṁ, kaṇikārīti ñāyati; Saṭṭhiyojanamubbedhaṁ, tiṁsayojanavitthataṁ.

Sahassakaṇḍaṁ satabheṇḍu, dhajāluharitāmayaṁ; Satasahassaniyyūhā, byamhe pātubhaviṁsu me.

Soṇṇamayā maṇimayā, lohitaṅgamayāpi ca; Phalikāpi ca pallaṅkā, yenicchakā yadicchakā.

Mahārahañca sayanaṁ, tūlikāvikatīyutaṁ; Uddhalomikaekantaṁ, bibbohanasamāyutaṁ.

Bhavanā nikkhamitvāna, caranto devacārikaṁ; Yadā icchāmi gamanaṁ, devasaṅghapurakkhato.

Pupphassa heṭṭhā tiṭṭhāmi, uparicchadanaṁ mama; Samantā yojanasataṁ, kaṇikārehi chāditaṁ.

Saṭṭhituriyasahassāni, sāyaṁ pātamupaṭṭhahuṁ; Parivārenti maṁ niccaṁ, rattindivamatanditā.

Tattha naccehi gītehi, tāḷehi vāditehi ca; Ramāmi khiḍḍāratiyā, modāmi kāmakāmihaṁ.

Tattha bhutvā pivitvā ca, modāmi tidase tadā; Nārīgaṇehi sahito, modāmi byamhamuttame.

Satānaṁ pañcakkhattuñca, devarajjamakārayiṁ; Satānaṁ tīṇikkhattuñca, cakkavattī ahosahaṁ; Padesarajjaṁ vipulaṁ, gaṇanāto asaṅkhiyaṁ.

Bhavābhave saṁsaranto, mahābhogaṁ labhāmahaṁ; Bhoge me ūnatā natthi, buddhapūjāyidaṁ phalaṁ.

Duve bhave saṁsarāmi, devatte atha mānuse; Aññaṁ gatiṁ na jānāmi, buddhapūjāyidaṁ phalaṁ.

Duve kule pajāyāmi, khattiye cāpi brāhmaṇe; Nīce kule na jāyāmi, buddhapūjāyidaṁ phalaṁ.

Hatthiyānaṁ assayānaṁ, sivikaṁ sandamānikaṁ; Labhāmi sabbamevetaṁ, buddhapūjāyidaṁ phalaṁ.

Dāsīgaṇaṁ dāsagaṇaṁ, nāriyo samalaṅkatā; Labhāmi sabbamevetaṁ, buddhapūjāyidaṁ phalaṁ.

Koseyyakambaliyāni, khomakappāsikāni ca; Labhāmi sabbamevetaṁ, buddhapūjāyidaṁ phalaṁ.

Navavatthaṁ navaphalaṁ, navaggarasabhojanaṁ; Labhāmi sabbamevetaṁ, buddhapūjāyidaṁ phalaṁ.

Imaṁ khāda imaṁ bhuñja, imamhi sayane saya; Labhāmi sabbamevetaṁ, buddhapūjāyidaṁ phalaṁ.

Sabbattha pūjito homi, yaso abbhuggato mama; Mahāpakkho sadā homi, abhejjapariso sadā; Ñātīnaṁ uttamo homi, buddhapūjāyidaṁ phalaṁ.

Sītaṁ uṇhaṁ na jānāmi, pariḷāho na vijjati; Atho cetasikaṁ dukkhaṁ, hadaye me na vijjati.

Suvaṇṇavaṇṇo hutvāna, saṁsarāmi bhavābhave; Vevaṇṇiyaṁ na jānāmi, buddhapūjāyidaṁ phalaṁ.

Devalokā cavitvāna, sukkamūlena codito; Sāvatthiyaṁ pure jāto, mahāsāle suaḍḍhake.

Pañca kāmaguṇe hitvā, pabbajiṁ anagāriyaṁ; Jātiyā sattavassohaṁ, arahattamapāpuṇiṁ.

Upasampādayī buddho, guṇamaññāya cakkhumā; Taruṇo pūjanīyohaṁ, buddhapūjāyidaṁ phalaṁ.

Dibbacakkhu visuddhaṁ me, samādhikusalo ahaṁ; Abhiññāpāramippatto, buddhapūjāyidaṁ phalaṁ.

Paṭisambhidā anuppatto, iddhipādesu kovido; Dhammesu pāramippatto, buddhapūjāyidaṁ phalaṁ.

Tiṁsakappasahassamhi, yaṁ buddhamabhipūjayiṁ; Duggatiṁ nābhijānāmi, buddhapūjāyidaṁ phalaṁ.

Kilesā jhāpitā mayhaṁ, bhavā sabbe samūhatā; Nāgova bandhanaṁ chetvā, viharāmi anāsavo.

Svāgataṁ vata me āsi, mama buddhassa santike; Tisso vijjā anuppattā, kataṁ buddhassa sāsanaṁ.

Paṭisambhidā catasso, vimokkhāpi ca aṭṭhime; Chaḷabhiññā sacchikatā, kataṁ buddhassa sāsanaṁ”.

Itthaṁ sudaṁ āyasmā tikaṇikārapupphiyo thero imā gāthāyo abhāsitthāti.

Tikaṇikārapupphiyattherassāpadānaṁ paṭhamaṁ.