“Yaṁ dāyavāsiko isi, tiṇaṁ lāyati satthuno; Sabbe padakkhiṇāvaṭṭā, pathabyā nipatiṁsu te.

Tamahaṁ tiṇamādāya, santhariṁ dharaṇuttame; Tīṇeva tālapattāni, āharitvānahaṁ tadā.

Tiṇena chadanaṁ katvā, siddhatthassa adāsahaṁ; Sattāhaṁ dhārayuṁ tassa, devamānusasatthuno.

Catunnavutito kappe, yaṁ tiṇaṁ adadiṁ tadā; Duggatiṁ nābhijānāmi, tiṇadānassidaṁ phalaṁ.

Pañcasaṭṭhimhito kappe, cattārosuṁ mahaddhanā; Sattaratanasampannā, cakkavattī mahabbalā.

Paṭisambhidā catasso, …pe… kataṁ buddhassa sāsanaṁ”.

Itthaṁ sudaṁ āyasmā tiṇasanthārako thero imā gāthāyo abhāsitthāti.

Tiṇasanthārakattherassāpadānaṁ dutiyaṁ.