“Idaṁ mama ucchuvanaṁ mahantaṁ, Nibbattati puññaphalaṁ anappakaṁ; Taṁ dāni me na paribhogameti, Ācikkha bhante kissa ayaṁ vipāko.

Haññāmi khajjāmi ca vāyamāmi, Parisakkāmi paribhuñjituṁ kiñci; Svāhaṁ chinnathāmo kapaṇo lālapāmi, Kissa kammassa ayaṁ vipāko.

Vighāto cāhaṁ paripatāmi chamāyaṁ, Parivattāmi vāricarova ghamme; Rudato ca me assukā niggalanti, Ācikkha bhante kissa ayaṁ vipāko.

Chāto kilanto ca pipāsito ca, Santassito sātasukhaṁ na vinde; Pucchāmi taṁ etamatthaṁ bhadante, Kathaṁ nu ucchuparibhogaṁ labheyyan”ti.

“Pure tuvaṁ kammamakāsi attanā, Manussabhūto purimāya jātiyā; Ahañca taṁ etamatthaṁ vadāmi, Sutvāna tvaṁ etamatthaṁ vijāna.

Ucchuṁ tuvaṁ khādamāno payāto, Puriso ca te piṭṭhito anvagacchi; So ca taṁ paccāsanto kathesi, Tassa tuvaṁ na kiñci ālapittha.

So ca taṁ abhaṇantaṁ ayāci, ‘Dehayya ucchun’ti ca taṁ avoca; Tassa tuvaṁ piṭṭhito ucchuṁ adāsi, Tassetaṁ kammassa ayaṁ vipāko.

Iṅgha tvaṁ gantvāna piṭṭhito gaṇheyyāsi, Gahetvāna taṁ khādassu yāvadatthaṁ; Teneva tvaṁ attamano bhavissasi, Haṭṭho cudaggo ca pamodito cā”ti.

Gantvāna so piṭṭhito aggahesi, Gahetvāna taṁ khādi yāvadatthaṁ; Teneva so attamano ahosi, Haṭṭho cudaggo ca pamodito cāti.

Ucchupetavatthu pañcamaṁ.