“Udentaṁ sataraṁsiṁva, pītaraṁsiṁva bhāṇumaṁ; Pannarase yathā candaṁ, niyyantaṁ lokanāyakaṁ.

Aṭṭhasaṭṭhisahassāni, sabbe khīṇāsavā ahuṁ; Parivāriṁsu sambuddhaṁ, dvipadindaṁ narāsabhaṁ.

Sammajjitvāna taṁ vīthiṁ, niyyante lokanāyake; Ussāpesiṁ dhajaṁ tattha, vippasannena cetasā.

Ekanavutito kappe, yaṁ dhajaṁ abhiropayiṁ; Duggatiṁ nābhijānāmi, dhajadānassidaṁ phalaṁ.

Ito catutthake kappe, rājāhosiṁ mahabbalo; Sabbākārena sampanno, sudhajo iti vissuto.

Paṭisambhidā catasso, …pe… kataṁ buddhassa sāsanaṁ”.

Itthaṁ sudaṁ āyasmā vīthisammajjako thero imā gāthāyo abhāsitthāti.

Vīthisammajjakattherassāpadānaṁ tatiyaṁ.