“Eko araññe girikandarāyaṁ, Paggayha paggayha silaṁ pavecchasi; Punappunaṁ santaramānarūpo, Koraṇḍiya ko nu tava yidhattho”.

“Ahañhimaṁ sāgara sevitantaṁ, Samaṁ karissāmi yathāpi pāṇi; Vikiriya sānūni ca pabbatāni ca, Tasmā silaṁ dariyā pakkhipāmi”.

“Nayimaṁ mahiṁ arahati pāṇikappaṁ, Samaṁ manusso karaṇāya meko; Maññāmimaññeva dariṁ jigīsaṁ, Koraṇḍiya hāhasi jīvalokaṁ”.

“Sace ahaṁ bhūtadharaṁ na sakkā, Samaṁ manusso karaṇāya meko; Evameva tvaṁ brahme ime manusse, Nānādiṭṭhike nānayissasi te”.

“Saṅkhittarūpena bhavaṁ mamatthaṁ, Akkhāsi koraṇḍiya evametaṁ; Yathā na sakkā pathavī samāyaṁ, Kattuṁ manussena tathā manussā”ti.

Koraṇḍiyajātakaṁ chaṭṭhaṁ.