“Jīno rathassaṁ maṇikuṇḍale ca, Putte ca dāre ca tatheva jīno; Sabbesu bhogesu asesakesu, Kasmā na santappasi sokakāle”.

“Pubbeva maccaṁ vijahanti bhogā, Macco vā te pubbataraṁ jahāti; Asassatā bhogino kāmakāmi, Tasmā na socāmahaṁ sokakāle.

Udeti āpūrati veti cando, Atthaṁ tapetvāna paleti sūriyo; Viditā mayā sattuka lokadhammā, Tasmā na socāmahaṁ sokakāle”.

“Alaso gihī kāmabhogī na sādhu, Asaññato pabbajito na sādhu; Rājā na sādhu anisammakārī, Yo paṇḍito kodhano taṁ na sādhu.

Nisamma khattiyo kayirā, nānisamma disampati; Nisammakārino rāja, yaso kitti ca vaḍḍhatī”ti.

Maṇikuṇḍalajātakaṁ paṭhamaṁ.