“Pabhassaravaravaṇṇanibhe, Surattavatthavasane; Mahiddhike candanaruciragatte, Kā tvaṁ subhe devate vandase mamaṁ.

Pallaṅko ca te mahaggho, Nānāratanacittito ruciro; Yattha tvaṁ nisinnā virocasi, Devarājāriva nandane vane.

Kiṁ tvaṁ pure sucaritamācarī bhadde, Kissa kammassa vipākaṁ; Anubhosi devalokasmiṁ, Devate pucchitācikkha; Kissa kammassidaṁ phalan”ti.

“Piṇḍāya te carantassa, Mālaṁ phāṇitañca adadaṁ bhante; Tassa kammassidaṁ vipākaṁ, Anubhomi devalokasmiṁ.

Hoti ca me anutāpo, Aparaddhaṁ dukkhitañca me bhante; Sāhaṁ dhammaṁ nāssosiṁ, Sudesitaṁ dhammarājena.

Taṁ taṁ vadāmi bhaddante, ‘Yassa me anukampiyo koci; Dhammesu taṁ samādapetha’, Sudesitaṁ dhammarājena.

Yesaṁ atthi saddhā buddhe, dhamme ca saṅgharatane; Te maṁ ativirocanti, āyunā yasasā siriyā.

Patāpena vaṇṇena uttaritarā, Aññe mahiddhikatarā mayā devā”ti.

Pabhassaravimānaṁ dutiyaṁ.