“Satta me rohitā macchā, udakā thalamubbhatā; Idaṁ brāhmaṇa me atthi, etaṁ bhutvā vane vasa”.

“Dussa me khettapālassa, rattibhattaṁ apābhataṁ; Maṁsasūlā ca dve godhā, ekañca dadhivārakaṁ; Idaṁ brāhmaṇa me atthi, etaṁ bhutvā vane vasa”.

“Ambapakkaṁ dakaṁ sītaṁ, Sītacchāyā manoramā; Idaṁ brāhmaṇa me atthi, Etaṁ bhutvā vane vasa”.

“Na sasassa tilā atthi, Na muggā napi taṇḍulā; Iminā agginā pakkaṁ, Mamaṁ bhutvā vane vasā”ti.

Sasapaṇḍitajātakaṁ chaṭṭhaṁ.