“Vikkama re haripāda, vikkama re mahāmiga; Chinda vārattikaṁ pāsaṁ, nāhaṁ ekā vane rame”.

“Vikkamāmi na pāremi, bhūmiṁ sumbhāmi vegasā; Daḷho vārattiko pāso, pādaṁ me parikantati”.

“Attharassu palāsāni, asiṁ nibbāha luddaka; Paṭhamaṁ maṁ vadhitvāna, hana pacchā mahāmigaṁ”.

“Na me sutaṁ vā diṭṭhaṁ vā, Bhāsantiṁ mānusiṁ migiṁ; Tvañca bhadde sukhī hohi, Eso cāpi mahāmigo”.

“Evaṁ luddaka nandassu, saha sabbehi ñātibhi; Yathāhamajja nandāmi, muttaṁ disvā mahāmigan”ti.

Suvaṇṇamigajātakaṁ navamaṁ.